Ball 儀態戒律十五條 —— 連乙明         1988 12 月       號 外
 
 
 
1。 去 ball 如果諗住偱規蹈矩,以正規 tuxedo 上陣,當然要打 bowbow 顏色選擇無一定,但形式以手結為首選,自動黏貼的為次,金屬扣調節伸縮的應儘量避免,因為金屬扣極難遮掩。
 
 
2。 打 bow 當然要襯番個腰封,舊時啲 bow 同腰封顏色單純,但依家就各式各樣,五花八門的顏色圖樣都有。所以避免一時錯手,揀了一些與你無毫不相襯的腰封,都係安全啲用番傳統黑色、酒紅色的腰封。
 
 
3tuxedo 如果唔襯番對黑色光面漆皮鞋便似乎美中不足,因為黑色漆皮鞋同 bow 一樣,係一套 tuxedo 必備的服裝配件。但依家啲男人去 ball 愈來愈 casual,所以普通一對 florsheim wing tips 都已經可以接受。不過那些鞋面掛住兩粒「鋃鋃」的皮鞋就一定唔好着,咪以為「鋃鋃」吓好瀟灑,其實老老土土俾人笑。
 
 
4又如果着住對漆皮鞋俾人見到裏面對白襪(或冇着襪)咁就大煞風景,碍眼之至。其實着黑皮鞋配深色襪才算適合相襯。
 
5夏天好多女仔都鐘意去晒太陽,所以去 ball 着露背裝千萬要小心,費事背脊上面果啲黑白陰陽太陽痕跡俾人看到,有碍觀瞻。
 
 
6女士們去 ball 都少不免會戴番啲珠寶首飾。在這裏奉勸各位,朱義盛仲勉強可以接受,但切忌戴太誇張如埃及妖后式嘅首飾,如果唔係人哋仲以為你係由旺角油尖區殺到上嚟。
 
                           現時戴假首飾也可以是時尚,但要一看就知假
 
7如果自問無徐小鳳嘅風範,又或者身裁短小,就千祈唔好着 Rococo 或宮庭式禮服,費事去到會場像衣服蓋過主人,人哋認唔出你。
 
 
8當你同 partner ball,而佢响舞會撞到啲名人朋友,正在寒暄一番之際,切忌同那些名人扮 friend,懶係熟絡,應該以不變應萬變。
 
9俗語有云:「第一個做嘅係天才,跟住果啲係蠢才。」香港有咗周潤發以上身 tuxedo,下身牛仔褲嘅第一次之後,其他男仕最好有自知之明,無謂扮瀟洒弄巧反拙。
 
 
10徐娘半老嘅女仕切忌與太靚仔或後生嘅 partner ball,以免有損清譽。
 
11如果係年華雙十嘅少女,應避免同上咗年紀嘅男人去 ball(老豆當然例外)。唔係人哋以為你比人包起,喊都無謂。
 
12舞會散後,通常都會有好多人响酒店門前排隊等的士,如果你唔諗住自己揸車赴會,為免同其他人一齊排排企等的士咁憨居,不如先到附近嘅 coffee shop 飲番杯野,然後再截車返屋企都未遲。
 
13响舞會裏,即使你飲慣 Lafite- Rothschild 75,都唔好咁張揚,自作主張 order 酒,應該隨主人發辦,切勿喧賓奪主。
 
 
14cocktail 果陣時,應該以白色紙巾包住酒杯,並以左手握酒杯,咁樣同朋友握手嘅時候,就可以鬆容不迫咁遞出右手。不過切記遞出你嘅手之前,要肯定自己隻手板手背有無濕到,如果唔係比人嘅感覺就唔係幾好喇。
 
 
15如果你想約 partner ball,又唔想佢誤會咗你,你可以﹕① 同佢講話你男朋友去咗 business trip,可否請佢充當觀音兵;約表弟去,包無撞板;③ 約你親密女朋友嘅男朋友去*
 
 
 
*小宇按:這點我不同意,講到男友,就幾親密姊妹都係假,你這樣做分分鐘會反目成仇,朋友都冇埋!