我媽媽係新界原居民，完全冇受過教育，經歷過二戰香港淪陷3年8個月。但佢最憎嘅唔係日本仔，而係共產黨。自小就訓示我哋共產黨好殘暴，唔好惹佢哋。當時太細個，唔知咩事，聽完就算。長大咗有機會睇到文革嘅書，睇咗十幾頁，連我呢個書蟲都不忍再睇落去，摺埋。過幾年就6.4，我好驚，唔係呀嘛？我哋香港真係要交返比呢個殺人政權？

當時冇能力移民，加上宜家比人話失效嘅「中英聯合聲明」，仲有鄧小平好輕鬆咁話「舞照跳、馬照跑」，咁咪繼續喺香港，打份工，飲飲食食又出糧咯。

直到689、777上場，所有「事情」就急轉直下。保皇黨有恃無恐支持政府「施政」，通過晒所有廢鐵爛橋，使咗我哋幾千億，而呢啲「利民」基建對大部份香港人係無經濟效益嘅。我成日諗：呢筆錢可以起幾多醫院、老人院、殺少幾多校，加多幾多社工等等等等。宜家仲話：要屋嗎？東大嶼人工島就啱晒啦！我有去參加遊行，嗰日遊行人數得幾萬人，我唔明，咁大件事，點解得咁少人反對嘅？唔通係我嘅問題？對自己懷疑又感氣餒！

2014年雨傘運動失敗，泛民割席，三子被捕。幸好有「等埋發叔」呢個「美麗」誤會，我哋先唔使又硬食「袋住先」呢個大騙局！

之後DQ泛民、年青立法會議員，唔夠票反對倒錢落海，睇到眼火爆，又可以點？香港冇得救，被染紅咗，開始認真考慮移民，搵多幾年錢去嘆世界，好過白交稅倒落海。不過就替下一代慘咁啫！

好啦…送中殺到埋嚟，無啦啦話咨詢咗，趕時間跳過立法會辯論，直上二讀，無論幾多團體，專業人士企出嚟，提出幾多憂慮同反對，相關政府官員只係交出啲形同兒戲，完全冇說服力嘅解釋。同之前一樣，腦海裡充斥住無力感。要加快移民腳步，開始計數：去邊個國家、做咩投資、積蓄可以撐幾耐？

身邊多是會計從業員，典型和理非派，講錢講前途唔講政治，遊行都冇去。仲有係淺藍，深藍，深深藍，佢哋覺得我中咗毒，我覺得佢哋未瞓醒咁咯。

6.9遊行我有去，6.12罷工去野餐，6.16遊行又去，6.21又罷工野餐，7.1遊行後野餐咗一陣。呢兩個幾星期，日以繼夜，夜以繼日咁睇晒幾個網媒嘅文字及現場報導，同埋轉載文章。喊過唔知幾多晚，心力交瘁無心工作。

6.12及7.1發生嘅事，已經有好多詳細報導，唔需要重複。我只係想講：年青人嘅抗爭舉動，改變咗我嘅退休計劃。我唔走，我要留喺香港，支持佢哋。我呢個廢中做唔到前線，但凡遊行、野餐，捐錢給反送中支援，中立網媒等，都會義無反顧地支持。所以，年青人，請比個機會我呢個60後廢中，参加你哋嘅野餐活動吧！

但唔等於我地乜都做唔到，淨係識望住個電視係到喊，然後話自己對唔住班後生，道歉完又道歉。

問題係，年青人需要你的道歉嗎？他們需要你的幫忙！

千祈唔好話自己廢，幫唔到手，講多幾講，就會跌落自我預言應驗，變成真廢，真係幫唔到手。

過去幾年，我見身邊好多朋友變成咁，有能力果D諗移民，無能力果D變成犬儒，變成真廢中，樣樣覺得做黎無用。

而你的敵人，最希望你變成咁樣，打都未打自認廢，未郁手先投降。

係時候發揮國產零零漆的精神：「就算一張廁紙、一條底褲，都有佢本身嘅用處。」

唔知係邊到睇過，平均一個美軍上戰場，背後要有七個人做後勤。呢七個人係咪個個都打得呢，當然唔係，有兩個可能係工廠入罐頭，有一個只係司機送貨，有一個係車衫，但佢地盡好自己的本份，上到場個軍人先會有戰鬥力。唔係上到戰場食物中毒，子彈又運唔切黎，軍服又爛溶溶。

作為一件社會上的廢中，你唔跑得唔打得唔曬得，但你仍然擁有好多資源，而呢D資源係班後生無。

例如錢、社會地位、人脈、人生經驗等等。

我地要贏呢場仗，要全方位抗爭。

首先係輿論上，班廢老未必會聽後生講，覺得佢地班後生仲細，容易受人利用，但你唔同，你係一個中年人，你說話的份量，你係有能力影響到家中班老野，你亦足夠的溝通技巧，不慍不火咁同班老野講，尤其當佢地已經退休，靠你份家用。呢個世界好現實，錢多話事權大，好好運用你的影響力，以及好好利用你屋企個遙控。輿論戰，係要由屋企開始打。

其次，我覺得更重要係，雖然而家已經有人籌錢幫義士打官司，但咁係遠遠未夠，將來必定有大規模的政治檢控同清算，好多被捕同被人抄身份證的年青人，會無故捲入漩渦。政府的策略過去好明顯，佢未必真係要告到人坐監，但佢有足夠資源將好多人拖入法律程序打殘你。好多人係當中前途盡毀，無書讀，無咗份工，無晒前途。

不過，我頭先講過，廢中有的係社會資源，當中好多事業有成，做緊公司高層，甚至自己開公司做生意，我希望一眾廢中發揮影響力，日後唔好因為呢個案底而唔請佢地，甚至可以優先考慮佢地。今次如果有後生仔因為抗爭而賠上自己前途，我地有責任賠返個前途比佢地，呢樣野我地真係有能力做得到。唔駛又搞個基金，又出黎籌旗，有字頭有檔野，就多一個比人搞的機會。Be water, my friend，你知道有D咁嘅人，就走去幫，群龍無首，吉。

就算你移咗民，唔代表你放棄咗香港，文西，我一樣有任務比你。以而家香港的情況，未來需要流亡的年青人，只會多，唔會少。你先去彼邦打點一切，日後麻煩幫下手照顧流亡在外的後生仔，佢地好需要一個穩定的圈子幫佢地撐過流亡的生活，好多海外華僑組織都比人滲透晒，信唔過，你地可能係佢地惟一信得過的人。

廢中們，請放低悲情，仲有好多野比你地忙。